為什麼小朋友不適合看叮噹?

  一般家長有個誤解,以為叮噹是老幼咸宜。問題是,日本漫畫家出品的叮噹巧合地成為香港版紅樓夢。

  這部香港版紅樓夢沒有賈寶玉,也沒有林黛玉。取而代之的是毒男、港女、沙塵友、老油條……等典型香港角色。

  靜宜︰有潔辟、見牙籤仔有新嘢玩就仆去人哋屋企、有渡假別墅就去同人瞓、出木杉有得畀佢抄功課又係成日去人地屋企,重同人交換日記,好彩出木杉唔係傻仔,最後都係搵件金髮鬼妹做老婆。呢啲咪就係大家成日講嗰隻港女囉!

  大雄︰懶、蠢、無運動、成日對靜宜性幻想,爭女唔夠出木杉來又玩妒忌,咪就係所謂毒男囉!

  牙籤仔︰呢個名我同佢改嘅,大家知邊個就算啦。呢類友仔持住屋企有啲錢就異常沙塵,港女恩物、傍友良伴,相信大家學生時代都遇見唔少。見高抬見低踩,當奴曾及其狗官咪又係呢個level?

  胖虎︰這是唯一比技安好的新譯名。所謂「伴君如胖虎」,在社會工作的各位必定心領神會,毛澤東金正日卡達菲都係呢類人。校園欺凌香港都非常嚴重,技安就是佼佼者。不過呢條友又真係兄妹情十足,又肯同屋企看舖,可算是義氣仔女,為所有角色中最有人性的一位。

  老師︰呢個真係經典,淨係識鬧大雄,原因緊係佢長期拖低合格率啦,唔係點解係日本做咗十幾廿年都無得升?呢件老油條都係諗住hea到退休架啦…

  大雄老母︰又係得個鬧字,個仔又點會成材呢?抵佢搵到個港女做新抱!

  大雄老豆︰頂!放工返來淨係識睇電視,男人做到佢咁切柒煲粥攞去餵狗算吧啦!

  叮噹︰次次大雄有事都搵佢拆,慈母多敗兒咪呢隻囉!重要成日攞啲強國高科技產品係度晒,次次都無好結果,真係強國貨最好代表。

  所以話呢套嘢真係講盡香港百態,但畀小朋友睇就好危險囉,電視台最好深夜先播,再唔係註明家長指引啦!

Leave a Reply

Your email address will not be published. Required fields are marked *